Gunung Fatuleu, Kabupaten Kupang, Timor Island

Dibutuhkan perjalanan sekitar 1,5 jam dengan kondisi jalan yang lumayan bagus akan mengantar kita tiba di daerah wisata alam, Gunung Fatuleu.  

Di obyek wisata yang sedang populer di kalangan kasyarakat Kupang dan sekitarnya ini, kita bisa merasakan kesejukan udara yang bersih dan merasa lebih dekat dengan alam.

Bagi anda pecinta tantangan dan petualang , sangat dianjurkan untuk tidak melewatkan kesempatan mendaki ke puncang gunung Fatuleu. Banyak sekali pengunjung yang tentu saja tidak akan melewatkan kesempatan berfoto dengan latar belakang gunung ini.  Dianjurkan bagi pengunjung untuk membawa bekal sendiri ataupun menyiapkan sendiri bahan makanan apalagi jika ingin berbarbeque ria di lokasi ini.  

Pengelola setempat menyiapkan mini lopo yang bisa anda sewa untuk berteduh bersama rombongan.

 

Pacuan Kuda, Babau - Kabupaten Kupang, 45 Menit ke arah timur dari kota Kupang

Pantai Batu Nona

Pantai Batu Nona

parmisi oooo…

su lama son lia Kupang ko? terakir tu basong jalan-jalan pi mana pas ada di Kupang? pasti pi pante tu aaang.  Memang su ma, ais di Kupang tu jalan-jalan murah meriah tu andia pi pante, karna dek-deka ruma, su pemandangan bagus, panas tapi dia pung angin sepoi-sepoi ju bisa beking mangantok kode.  Apalai kalo pas matahari terbenam, lu rusak.. ko kanapa rusak? ho eeee.. ko pas ada dudu deng basong pung nyong ato nona, ras-rasa ke su son ada orang laen lae di ini dunya hanya basong deng babi yang lewat-lewat dong. hah, babi? jang heran aaa.. ko orang yang tenga di deka pante dong ada piara ame itu fafi jadi kalo sore dong biasa JJS (jalan-jalan sore) ko basong kira basong sa yang perlu refresing ko? hihiihiihh…

Tapi itu kalo pas basong ada dapa tabrak ame bonus sa hehehee. son selamanya bagitu.  makanya kalo pas matahari su turun tu na mata dong jang ili ala, tangan dong ju bagitu hehehe.. b pung maksud, lia ame itu matahari terbenam talalu gaga mamati.

Kapingin lia ame dia pung gaga  ko? Ini fot-foto dong ni di  Pantai Batu Nona Kupang, kalo son tau na basong naek sa bemo jurusan Oesapa. Pas dong mo putar di kilo sapulu na basong turun su ko lia ojek ko ojek dong antar pi di tu pante, sakitar 1 kilo stenga (km bukan kg ooo! gula pasir mangkali ko kg, hehe).

Dia pung nama Batu Nona karna katanya (tau ini -nya di kata ganti untuk sapa, ma anggap sa 'konon') itu batu yag menjorok di pante tu kalo lia dar laut na dia mirip ke non-nona, son parcaya na sewa ame parahu ko cek sandiri eee. Kalo basong ada tau versi laen na babagi kas katong itu info ko katong bisa carita ame katong pung ana cucu dong.

bunga pica piring

awih!!!! su laaama mamati b son maloi ame ini blog ko tadi b mau mulai beking entry baru ko babagi carita di kawan dong yang rindu katong pung 'kota karang' atau yang kapingin tau apa yang unik ato khas di Kupang b bingung mau katik di lobang mana.. hahaeeeee… ini mangkali b yang su PDI (penurunan daya ingat) atau b maso dalam golongan gaptek (gagap teknologi). Neu… kawan dong sandiri yang kas nile ame sang beta.

B buk-buka b pung foto dong di laptop ju b dapa lia ame ini bunga yang menurut beta paleng gampang katong dapa lia kalo katong ada pasiar kaliling Kupang.  Co tebak co itu bunga apa? hmmm.. b yakin ada yang bilang bunga kartas, bunga mai-ana, bunga doi, ato bunga desa (2 yang tarakir ni son termasuk aaa be rasa diantara kumpulan bunga dong, hhihih).

Yang b mo omong ni dia pung nama BUNGA PICA PIRING (salamat oo kalo ada yang tebak dapa ame sang dia!)

Ko kanapa pica piring? ho eee.. ko kanapa ju lu tanya? mau tau sa ko mau tau mamati? ko do'o sa su.. (do'o tu artinya su buntu jadi su son bis-bisa lai, conto sa kalo lu dapa suru dongko orang ma dia barat ke baras sat karong goni. lu tar bis-bisa lai na lu minta do'o, bagituuuuuuu).

B ju son tau asal mula orang dong kas nama sang dia PICA PIRING, ma kalo menurut b pung analisa itu bunga pung model sama ke piring yang su pica tabala (entah karena jato sandiri ato karna bakalai ruma tangga ko bini angka banting, hahaha, jang tarsinggung ooo). Su bagini lama b hanya baru dapa lia itu BUNGA PICA PIRING yang warna PINK alias MERA MUDA deng warna PUTI (ko memangnya lu ada parna daplia warna laen? na jang lupa komen di sini ato tag dia pung foto ko beking jadi barang bukti aaaa).

Dia banya tumbu di orang pung kintal ruma (kintal tu halaman, ngao!), b parna daplia di kuburan ju, son parcaya pi cek sandiri to (ma awas setan oooo… hohohohhh…), di pante ju ada tumbuh, ma bukan di atas pasir aaa, di pante tapi pas di bagian yang ada tanah tooo. hish! susah ju kalo mo terangkan kas orang banya parotes ni.. hehehe.. maen gila sa oo mas deng mba bro dong.. son usah darti aaa… katawa lebe enak B RASAAAAAAA!!!

In bunga dia kic-kici sa, kalo lu badiri mangkali dia sampe di lu pung sosoruk tu. Dia kalo su tumbu dimana dia babanya disitu jadi lu kalo mau ada taman bunga satu macam na lebe bae tanam sa ni bunga tooo. Dia ju wangi, kalo lu cium pas idong ada son baingus baru dapa rasa ame sang dia.

Pasti yang balom parna dapa lia ato tau ni bunga su penasaran tu aaa.. ini.. b ada bae hati jadi b ada pasang ame dia pung foto ko basong loti ame sang dia do.

Kalo ada kata yang basong son mangarti na son usa mal-malu tanya di b aaaa… ko in b su usaha mamati pung ko pake katong pung bahasa ko supaya bukan itu bunga sa yang lestari ma bahasa deng budaya ju bagitu.. yang setuju jang jang konto ooo.. heheheh.

Dirgahayu kota Kupang ke 17 dalam refleksi pendek

Desa Oesao, 1 jam dari Kupang

Kota Kupang ulang tahun.. selamat merayakan ooo, ma jang lupa kalo ktg bilang ktg warga 'kota' na ktg pung cara berpikir su menyesuaikan ko blom? contoh kiiiiciiii sa... 

ktg biasa buang sampah di mana oo? pi di kali ko??? kasian ee son ada pasukan kuning yg pi kas barisi di kali dong.. 

na kalo mau ktg buang sampah di tempat sampah na pemerintah tolong ko siap kasi ktg tempat sampah yang terjangkau dan pas jam dan waktu ya pi angkut ko jang tunggu ko su tinggi sama ke gunung Mutis n babo fiuk ko warga dong su panyaki baru sadar ko pi angka. 

Pantai Kelapa Lima, Kupang

Pantai Pasir Panjang, Kupang

Kalo abis makan gula2 ko roti moka ko.. abis minum aqua di galas ato botol na bapa bo'i dgn mambo'i jang lapas sambarang sa di tenga jalan aaang, pegang tahan ko katumu tampa sampa br buang na kanapa kalo sonde na pegang bawa sa sampe ruma baru buang di tampa sampa di rumah too.. kan aman, pas musim angin son ada tas palastik yang terbang datang tutup ame ktg pung biji mata ko katong batabrak mati, ktg pung ana basodara dong ju bebas dari diare.

kalo pemerintah ju peduli deng hal kici bagini na tiap 100m bagitu siap kasi ktg tampa sampa ko ktg bisa buang di tampa sampa paling dekdeka. ais itu na tolong ko jang inga korupsi sa ko itu doi pake sewa ktg pung 'pengacara' (pengangguran banyak acara) dong ko angkut jam2 tertentu pi tempat pembuangan umum di mana lobang kok.

Kalo mau lebe canggi lai na sosialisasi ko ktg pung sampah kertas, palastik, kaca, n besi dari tiap ruma tangga tu su kas pisah memang jd mau pi buang di tampa pembuangan umum na su ada siap ju tampa yg lebe besar n tapisah, otomatis bantu ktg pung tukang kumpul kertas, palastik n besi dong ko tamba doi beli sayor aaang...

neu kaka adi mama bapa dong yang ada gabung disini ko kenal katong pung kapala daerah (gub, bup, walikota, camat lurah, rt/rw) na tolong ko kusu-kusu ame sang dong ko lia ame ini masalah satu do jang hanya Green n Clean di muka jalan sa ma di kali dong sampah ada ponu2. Kanapa ko penting, karna kalo katong mau ktg pung ana cucu masih bisa menikmati hasil bumi dr katong pung tanah kupang yang orang bilang gersang tapi damai na ktg jaga dari sakarang, jang ko dong pas gali tana yg ada hanya palastik deng besi karat deng beling dong. mau suru dong makan katong pung sampah ko???

jang asal rame nonton pawe ma inga ko jang buang sampah sambarang.. isi maso lai di palastik kresek tu ko bawa pulang pi rumah. ko ktg pung kota rapi manis yang bangga sapa lai kalo bukan katong sandiri. Mari katong buang katong pung egoisme trus siap tampa yang babae buat katong pung generasi penerus dong... Dirgahayu KOTA KUPANG.